北九州自由行2014［序］

呢次北九州自由行都算始料不及，

原本只係邀約一家去的，

點知原來好多人都有興趣。

最後變成大細加埋一行17人....

朋友聽到都笑謔係不可能的任務，

最後因為有充足準備，

加上有貴人幫忙，

雖然偶有蝦碌，

總算順利完成行程。

呢幾年去日本都有兩個人幫忙，

第一個要多謝我嘅靚女同事 Inez，

每年我 plan 行程遇有日文疑難都係佢幫忙翻譯，

或幫手註冊之類，

另外多謝我嘅好姨甥 Joe，

佢功勞更大，

每次要電話預約之類就要佢出馬，

冇計，因為佢識流利日文 XD

呢次因為組織龐大，

我哋就要多啲人幫手，

其一係團員甲嘅日籍老細，

呢次溫泉旅館同別府杉乃井都係經由佢電話預約，

另外係姨甥仔嘅女友，

佢喺日本福岡讀書，

正好要佢代買我哋觀豚需要嘅火車+船套票，

由於聽聞座位好緊張，

我哋又一大棚人，

冇佢幫忙相信我唔敢安排觀豚之旅。

衷心多謝以上

呢次行程只有一樣令我好唔開心，

就係唔見咗一張記憶卡，

我影相咁多年，

未試過未見菲林/記憶卡，

呢次仲要係啲咁珍貴回憶...RRRR

翻查相片，

相信記憶卡係喺長崎鍋冠山、

因為記憶爆滿要換卡而現場環境太黑，

跌咗都冇人發覺所致。

記憶卡記錄咗呢次3份1行程記錄，

只有小部份因為過咗落手機至倖存.....

搞到我都冇乜心機執相 > <