SuperPark Hong Kong

話說 Bryan 班級有個秘密 wechat 群組，
聽說入組非常困難，
Bryan 其中一個老友多番要求入組遭拒  😆
呢個群組組員都以親戚名稱稱呼，有阿媽、家姐、姐夫等等...
Bryan 係四弟，未婚 😁
我提議 Bryan 約呢班咁吹水嘅組員一齊玩番日，
結果一呼百應。
我叫 Bryan 幫手問吓組員可唔可以比我呢個叔叔練習吓影相，
經商量後，批准我影一個上晝，
於是就有以下爛相....

見到佢哋玩得好開心，
大久將來大家就各奔前程，
進入不同嘅中學，
希望可以保持友誼啦

卒業。

Bryan 讀嘅小學鮮有活動比家長參與，家長只可喺學校嘅網頁內download 番活動嘅照片，啲相4個字 - 慘不忍睹。毅然同學校毛遂自薦做畢業禮攝影義工，學校亦爽快應承。畢業禮當日問負責老師，邊位係學校聘請嘅大會攝影師，想同佢打聲招呼....點知老師話係冇嘅，只有一位喜歡攝影嘅老師幫吓手，當堂O 晒咀...

 

跟手仲留空中間位置比我影企定定果啲大合照 (其實我鍾意影花絮的)，感覺有啲無厘頭，話晒佢哋完全唔知我底蘊，啲相抄晒咪大鑊? 

 

 

 綵排時我已現身，影吓Bryan班房先，順手影埋班主任 XD

Bryan 甚少講佢校園生活，但當日所見，Bryan 似乎頗有人緣，深感安慰，此為老友之一

 

 

 

 

六年小學生涯彈指而過，光陰似箭...

 

 跟住全級同學都要演出嘅話劇，估唔到又幾好睇

 

 

 

聽Bryan 講每個學生揀選兩個項目然後抽簽，佢竟然揀失手風險好高嘅跳繩同搖搖，最後抽到跳繩，我見到佢同學玩花式搖搖失手，成個搖搖甩手飛咗後面.....如果飛正嘉賓塊面就過癮咯...

 

 

未掉過畢業帽點算畢咗業? XD

以後各奔前程，希望同學仔可以keep 住聯絡~

中秋坪輋舞火龍2017

舞火龍殺入坪輋?

雖然家住粉嶺，
今年至知坪輋舞火龍踏入第三年。
據說紮火龍老師傅以往住薄扶林村，
已有30年紮火龍經驗，
遷往坪輋想將呢個傳統流傳下去。

我一直想睇火龍，
不過大坑實在太遠，
而家附近有個山寨版，
梗係要觀賞一下，
中秋節當日早早食完飯打算搭的士去坪輋，
點知等咗半個鐘至有車，
其實經過嘅的士唔少，
不過大部份係冚咗旗嘅，
唉，難怪香港的士司機成日比人鬧😖 

好彩我哋預早咗時間，
去到時間啱啱好

聽說舞火龍的係由一班村民和一班義工組成，
熱血有餘而經驗不足，
火龍上的香火亦略嫌唔夠鼎盛，
希望佢哋愈做愈好，
將呢項傳統發揚光大啦

隨影 - 香港歷史博物館

喺 Facebook 見到朋友帶囝囡去歷史博物館，
影咗啲相，
見到呢個懷舊feel，
啱晒我channel，
搵日帶咗 Bryan 去影吓相...

原來而家歷史博物館做緊玩具展，
見番好多我童年玩過嘅玩具，
頗有感觸，
出到館外見到有白兵做佈景，
又有得影，哈

屯門美樂 DRAGON BOWLING

假日 Bryan 又約咗細表姐去碌鈴，
屯門美樂呢個保齡球場真係平到笑，
假日每個鐘任玩只係 $100，仲要係免租鞋，
我哋四個人玩，平均每人玩足4局，
1局平均十幾蚊，分分鐘平過大陸玩 XD

西環隨影

大概兩星期前睇到無線一個節目，
係介紹西環，
其中就有介紹食點心嘅新興食家，
媽咪話想去試。
我就比鐘聲泳棚呢個景點吸引，
見好耐冇同 Bryan 影相，
趁佢踏入11歲拎得兒童身份證，
周日就舉家去西環行吓影吓相。

第一個目的地係新興食家，
去到果然排晒長龍，
雖然係排隊，
但其實排到你時都係見到有位就要攝人去果隻，
啲阿姐太忙都唔會點招呼你，
食後感係味道唔錯的，
個人覺得都係添好運勝一籌，
而且太迫人坐得唔係好舒服，
叫做試過就算 。

食完就依google map 行去鐘聲泳棚，
行到半路我起咗疑心，
見條路愈行愈上，
好似離個海愈嚟愈遠咁，
於是見到有條長樓梯又望到海，
諗住落去倚住個海邊行實冇衰，
點知係掘頭路嚟嘅，
但幸好錯有錯著，
見到呢個景，
影咗全日最滿意嘅相 XD

影完相跟番google map 行，
原來有條長樓梯行落去泳棚，
落到去見到好多人呀，
仲有唔少貌似菲籍工人楂住相機等影相，
排到我哋時拿拿聲叫 Bryan 影幾幅相就閃，
連全家福都唔記得叫人楂機影，嗚...

到此一遊相

德福廣場「星．光．幻彩萬華鏡」

Bryan 陪咗我去九龍灣換 earphone，
途經德福廣場，
見到有萬花筒影，
就排隊影咗幾張，
因為多人排隊關係，
匆匆影幾張留念就算，
如果有得慢慢影就好玩了