RITA & ANDY Pre Wedding

謹祝 Rita & Andy 婚姻幸福、永結同心

 

第一期 & 迪士尼星級款待 & 五周年限量版紀念卡儲齊達成

Bryan 經過兩次迪士尼之旅，
終於儲齊第一期共九款閃咭，
唔知第二期由幾時開始呢?

巡視業務 @ APR + 奇妙處處通會員尊享晚會

迪士尼樂園喺特定日子搞咗個叫做 <奇妙處處通>會員尊享晚會，
佢會喺放完煙花後再加插兩小時比報咗名會員繼續玩，
又或者同一班卡通人物合照。
我哋一家上周五出發，
Bryan 對呢個幾乎每月一次約會依然表現興奮





古靈精怪~









樂隊變成佈景板
























叫佢扮嚕囌惡死樣，佢整咗咁樣出嚟






終於到晚會時刻啦...
我哋入到去見到米奇金像劇個位已經有人排隊，
都唔知係乜嘢卡通人物即管照排，
唔夠幾分鐘，我哋後面已經係一條長龍，
原來就係呢篇 blog 第一幅相 -- 著禮服高飛同 Donald，
Bryan 影完想過對面同卡叔影，
可惜已經截咗龍，
於是我哋就行去一條未見截龍隊，
人數眾多，不過原來大多數人都係見人排我又排..
問番工作人員，
原來係巫師米奇..... 正呀





如是者，Bryan 呢一晚同咗一班平時少見卡通人物合照，真係飽晒

如果見條隊人龍長的話，

仲可以同媽咪或爹哋玩唔使排隊機動遊戲打發時間，

所以 Bryan 話下次一定要再嚟

...乖仔，當然冇問題啦，

不過下次唔好一離開樂園就瞓，

你都幾重吓

【完】

拼豆系列之胡迪

Bryan 話媽咪砌咗巴斯比佢，

應該輪到我，

所以就有咗下面幅圖....

文化博物館之兒童探知館

上回講到我同 Bryan 走馬看花式睇完彼思動畫展，

其實係趕去兒童探知館同 Bryan 報名學做盤菜。
呢個小活動是日得一場兼係得十個名額，
所以拿拿聲就諗住落去報名，
點知落到去見到售票處已經開始打蛇餅，
好彩問一問當值員工至知原來動畫展門票已經可以入埋探知館 
好彩 Bryan 都趕得切報名 （排第八）...
仲有幾個字時間就逛一逛個場館，
有一個遊戲室，裏面有好多懷舊玩具

睇完呢個遊戲室，時間啱啱好，
Bryan 就化身小村民學做盤菜



體驗完畢，
見到有 D變裝喺度幾過癮，
叫 Bryan 扮晒蟹先






夠晒皮，閃人~












話說同 Bryan 離去準備去沙田中心醫肚，
見到外面條人龍嚇到打咗個突，
點會多人成咁....
唔通人人都係放工趕過嚟?
呢一刻真係慶幸早到四個鐘


【完】

彼思動畫25年 PIXAR 25 years of animation

Bryan 係巴斯迷，
今次以香港為首站「彼思動畫25年」巡迴展梗係不容錯過。
呢個展覽喺沙田文化博物館舉行，
都算方便我哋呢 D 新界人





是日為周六，
我同 Bryan 中午時候到達，
人眾唔算太多，
每個影相位大概三四個家庭輪流影相留念...
第一時間搵至愛巴斯光年，
之前見有網友post 出嚟相係有鐵鍊圍住，好彩唔係啫








唔好以為冇人排隊影相，
只不過眼見所有家長都係隊個小朋友去巴斯同胡迪小腿處，
所以只要離遠少少就可以拍到佢哋半身像








以下幾幅都要相當耐性（特別係指Bryan ），
要等所有人走出畫面一剎按快門

之後入場就唔比影相 lu...
我哋以急促步伐匆匆睇完呢個展，
因為要趕去下一場
去邊?
欲知後事如何，請看下回分解 
後感︰個人覺得呢個展相當好睇
（之前有朋友朋友去過話冇嘢睇，
可能因為有咁心理準備之下去睇有驚喜）
場內《反斗奇兵》幻影箱加埋「藝術風景」呢個十五分鐘短片已經值回票價，
雖則我哋冇睇幻影箱，因為同迪士尼入面果個一樣...
我尤其喜歡彼思動畫角色雕塑，
好正，真係想據為己有...




【待續】