頑遊新加坡4天2011 DAY 3 (Part 3)

頑遊新加坡4天2011 DAY 3 (Part 3)

大佬查到去晚間動物園(Night Safari) 係去 Ang Mo Kio 站搭巴士，
咁啱我睇到幾個 blogger 讚不絕口食肆又係呢個站，
於是我哋喺烏節路行到 5點零就出發去 Ang Mo Kio ，
尋找海鮮螃蟹王食個early dinner，
食佢哋出名奶油蟹同螃蟹米線....
然後去 Night Safari，
我哋喺車站行咗幾百米至搵到個當地師奶問路，
師奶睇完個地址話，應該係對面馬路再行多幾百米就到...
我哋行行吓佢突然叫停我哋，
話唔肯定係咪前面，話我哋可能係反方向行咗，
即係話條路就冇錯，只係頭尾方向唔確定...
又補充話如果行錯咗，可以搭番公車往回頭路。
結果.... 我哋真係反方向行錯咗，
仲要等咗一陣至截到的士，
去到海鮮螃蟹王已經見到大排長龍，
唔係啩..... 6點咋喎....
由於時間關係，只可望門興嘆 





諗住聽日 last 一日可以去食午餐，
我用蹩腳普通話問女侍應：請問你明天...
女侍應：你講番廣東話啦
...........
最後女侍應答我係下晝5點至開門，噢，註定無緣....


之後打的去 Night Safari，又唔係貴喎，十幾坡紙搞掂。



我又趁佢哋買飛時同個囝快拍















Hoyin 問清楚媽咪呢隻鱷魚係真定假至敢行過去






入場個天仲未黑晒，仲影到一幅



排隊睇 show，呆企半粒鐘，夠鐘至放行，
唔明點解唔早 D 放人入去坐，
講番個 show，真係爛 show 一個，D 動物冇個聽話，
仲曳過 Hoyin XD
幾個表演都爛尾
最後坐遊覽車夜探動物園，
D 動物疑似被點穴，動物數目唔多距離又遠，
感覺同長隆爭好遠....
我大佬大嫂呢次係二度光臨都話呢次感覺差好多
既然冇嘢睇就閃人，
我哋又打的 (5個人打的分分鐘計落平D) 去老巴剎食串燒。



呢個叔台好熟口面，應該係見過D blogger 影佢



我哋點咗沙爹、燒魔鬼魚、燒大蝦，
又叫咗炒菜、薄餅、鍋貼、餃子.....
味道方面不過不失咁喇，不過就好飽
食完都成十一點，我哋行返酒店幫助消化....


聽日就要返香港，好唔捨得呀


【Day 3 完】