私の大澳旅行

 
4月12日，呢日係 Hoyin 復活節長假既最後一日，
我同 Shirley 都請左假，
原先諗住去長洲拜訪神奇復業既英皇餐廳，
食番久違既揚州炒飯同凍檸橙，
點知 Shirley 個家姐報料，話餐廳逢禮拜一休息，
於是臨時決定改去大澳。
搭小巴去上水諗住轉搭去屯門碼頭既小巴然後搭船過大澳，
好彩又打比住屯門既親戚問問，至知原來唯一一班船已經開走，
於是又要改搭巴士去青衣，
然後轉港鐵去東涌轉搭旅遊巴 (好轉折呀...)
良久良久，終於到達闊別兩年既大澳...
閒日關係，好多鋪頭都冇開門，
見有間冰室，門面OK，就入去幫趁。
坐低至發覺，兩年前都係幫趁佢


Hoyin 享用緊美味既腿蛋治

鐵閘寫滿詩詞，我覺得曾灶財手字 藝術味重D



呢張靈感係黎自劉華既道地綠茶



話說 Hoyin 一踏足大澳，見到D觀光船經過，已經話要坐，
不過據聞好少可真係睇到白海豚既，
使$80 (連工人) 乜都睇唔到咁咪好蝕?? 梗係唔睬佢啦...
難得 Hoyin 好有耐性，
隔 5 分鐘就會話︰「爸爸，我想坐船船...」
我吼佢一次呻話太陽好晒既時候話︰「你咁怕晒，點坐船船呀？」
「船船有野遮架﹗」
頂.... 係咩，坐咪坐囉....
去到觀光船果度，見架船已經有兩個好似坐到發吽豆既西人....
船家落力兜搭我地，我小心咁問︰「查實有冇機會見到海豚架？」
「...我今朝都見到」船家答。
我形住佢眼神有D 閃縮...
「細路使唔使錢？」
「細路免費啦。」
靈光一閃，柴九個百佳廣告閃在心頭，
決定使出好耐冇用既羅湖城購物必殺技...
「$50全部啦 」
「唔得... 已經好平架喇。」
我幾驚佢唔講呢句，佢唔講我又點使出下半招呢...
我拉住 Hoyin 作勢走，都唔夠兩步佢就話︰「好啦...好啦...」
【超.... 懶醒... 咪平得果$10 】
上到船，果 pair 西人投以友善既目光，
梗係啦，終於開得船啦



點知出到海，真係見到好多海豚呀
可惜船行相當顛簸，又掛住睇冇影到相....
架觀光船都算細，又高速航行，其實都幾拋，
遇著體積較大既觀光船附近經過，拋動幅度仲大...
「如果老婆同個囝同時跌落海，你會救邊個先？」一個怪念頭襲上心頭...
「...... 」
天呀，點解要我做咁殘忍既抉擇呢...
喺我胡思亂想之際，個船家突然話︰「呢個我地叫將軍石。」


呢幅係側面，船家話係一個將軍俟住個山度，大家話似唔似？



玩完觀光船，時間都差唔多，去街市附近影多幾張相就打道回府。




※ 行程至此完畢，祝旅途愉快 ※