我哋先返東橫INN 拎行李，
就搭新幹線去熊本。
呢程車唔使劃票都得，
因為班次好密。
我哋去到熊本，
因為知道東橫INN 熊本駅好近車站，
我就老點大家去是旦一個出口，
去到出口見到迎面嚟緊幾個o架妹，
就走過去問路。
o架妹表現好亢奮，
用比我更差嘅英文嘗試同我哋溝通，
然後自告奮勇行返回頭路帶我哋去目的...
行行吓我哋都覺得唔對路，
去到前方無路，
有團友發現東橫INN 標誌，
不過係喺隔咗火車軌嘅對面馬路，
咁即係我哋行錯對面出口，
呢個時候見到幾個o架妹拎晒手提出嚟可能想搵GPS，
仲諗住喺冇斑馬線嘅情況下帶我哋過馬路，
我梗係唔同佢癲啦，
淨係用手勢表示我哋行番回頭路。
跟住佢哋好有默契90度鞠躬，
憑我睇日劇多年嘅經驗，
佢哋仲講咗對唔住，
見到呢個情景我覺得好好笑，
就叫番班細路翻轉頭同呢幾位姐姐合照
跟住佢哋都拎咗手機叫我哋幫手影番張留念 ^^
都算幾有趣經歷。
***************************************
我哋去到東橫INN check in，
見到原來有免費咖喱飯食，
不過就限70人 (好似係)，
距離派飯仲有3個字時間，
團友話時間咁啱不如食埋先去行街，
...又得啫。
先上房擺低行李，
Bryan 拿拿聲將兩張床合併，
佢話要一家一齊瞓 XD
落到樓下時間剛剛好，
有咖喱牛肉同咖喱馬肉揀，
我對馬肉仲係有啲抗拒，
一家都揀咗牛....
講真麻麻哋，
不過免費就將就吓
食飽飽去上下通行街街
【待續】
沒有留言:
張貼留言