HAPPY BIRTHDAY TO BRYAN ~ 7歲生日啦 ^ ^

既然生日都要溫書，冇得去玩，

咁我想起碼生日蛋糕要比個驚喜 Bryan

Bryan 呢期最喜歡係 Gundam，

美心、東海堂之類又冇現成o既，

只可以搵訂製蛋糕。

本來粉嶺區有間好出名，又的確整得好好好靚o既樂怡餅屋，

可惜預約期所限，加上一整要3磅以上就放棄。

卒之喺 Yahoo 拍賣按關鍵字 "生日蛋糕"，

搵到 CF Cake 私房蛋糕
比埋圖問過佢，訂製Gundam Wing 只要2磅蛋糕就做到 (如果簡單啲圖案一磅都可以)

問完價錢係，唯一考慮問題係要去荃灣取。

最後為咗氹 Bryan 開心，扑鎚。

拎完蛋糕返屋企，第一時間拆嚟睇睇先....


WOO.... 顏色鮮艷成咁，食唔食得o架


到晚上切蛋糕，Bryan 果然好開心....

老實講，蛋糕味道一般，我哋食開、樓下餅屋出品o既蛋糕好食得多，

但係見到阿囝o既笑容，我覺得值了


Bryan 許願時陰陰咀笑，問佢許咗乜嘢願，

佢話唔講比我哋知


希望Bryan 呢個生日過得開開心心啦~

btw，出年生日最好唔好撞正考試日子啦

愉景灣沙灘獵蛋奇兵2013【序】

尋日收到快遞送件，Bryan 期待中...

以往兩年復活節假期都有去愉景灣，

不過就冇報過獵蛋奇兵，只係去愉景北商場玩吓。

今年媽咪提議報名玩吓，

於是就約埋表哥表姐齊齊報名，

Bryan 聽日7歲生日，啱啱好可以報7-10歲組別，

同表哥表姐一齊玩。

但一路以嚟聽講都話呢個活動好爆，好難抽~

曾經見過一個 blogger 話抽足咁多年都抽唔到，

女兒今年已經十歲係最後機會云云....

點知好好彩，Bryan 第一輪抽籤就抽中

但係表哥表姐們全部唔中，

咁點好呢，交唔交錢呢? 如果唔交錢佢哋第二輪又全部抽中咁咪....

結果我哋決定錢照交，然後期望大家第二輪都抽中可以一齊玩啦。

最後，兩個表姐第二輪抽中，表哥不幸抽唔到

唯有大家先喺愉景北玩餐飽，

到比賽時表哥喺一旁打氣啦.....

再會Disneyland - 灰熊山谷初體驗

Bryan 上次考試達標，應承獎勵佢請佢去迪士尼。

早幾年都會去迪士尼樂園同 Bryan 慶祝生日，

今年生日碰正考試週，就當埋慶祝生日啦

啱啱呢個周日，特惠年證都可以入場，

咁就可以約埋表姐表哥一齊玩餐飽啦~~



我哋開門冇耐就入到場，

第一時間梗係飛奔去未玩過灰熊山谷先啦



可能時間尚早，唔使排隊就玩到極速礦車，爽~

玩完過山車，表哥表姐都未到，

影吓相先




呢個對小朋友嚟講都幾好玩，不過千祈唔好整濕我部相機



表哥表姐到齊，又玩多轉極速礦車，

話說極速礦車冇想像中咁刺激，

連班細路都唔驚，玩得好開心






原來反斗大本營開咗間精品店，又幾靚喎



呢一日班反斗星好積極，

見親啲哥哥姐姐都問人攞貼紙，

去到呢到，姐姐都冇托手，

不過就要玩遊戲，

猜程尋贏到佢先有得攞小朋友想要貼紙....


遊戲一路繼續，小朋友們始終都會猜贏佢，

見佢每次從一大疊貼紙揀一張小朋友想要貼紙，

望到都覺得麻煩。

於是我話，不如一鋪過，贏咗拎晒一大疊貼紙啦~

估唔到呢位姐姐一口應承

最後比 Bryan 表姐一個拎晒

事後表姐當然識做，人人有份啦



去食午餐lu.....

人山人海，我哋分頭等位，最後竟然等到個靚位，

可以一班人一齊坐


人生何處不相逢，喺樂園撞到老友碩碩，

諗住一齊去玩巴斯光年，

可惜巴斯光年條長龍望到都頭暈，

無緣一齊打怪獸，搞到兩兄弟悶悶不樂






大人們開始嗌攰，班反斗星依然體力充沛，

個個都話要再玩極速礦車，

於是大人們就坐低食嘢兼休息....

反斗星們就連續玩咗三次極速礦車

呢日佢哋超開心，約定五月再嚟

Bryan 7 th Birthday Party

今年 Bryan 都收到好多禮物，多謝各位 【包括冇 post  出來的】


一如以往，

Bryan 都係連同生日日子相差一星期堂家姐一齊搞生日，

今年 Bryan 生日日期撞正考試週，

只好叫家姐遷就早少少搞....


整靚個蛋糕....齊心就事成


翌日朝早，Bryan 已經急不及待拆禮物，

未有花紙包裝禮物 Bryan 已經好鍾意，

其中兩個伯娘不約而同買咗背囊比 Bryan，

可能佢哋都留意到 Bryan 孭嚟孭去都係果隻

兩個背囊都好靚，多謝晒~~

Bryan 拆埋有花紙包裝禮物，睇吓仲有冇驚喜...

表哥姑姐送模型車，good~~


家姐送 LEGO，Bryan 當正係變型金剛，好開心~


不過數到 Bryan 最興奮都係收到呢份禮物


小童YY 羽毛球拍連護腕，款靚又係小童版，

咁啱早兩日同佢行商場，講過 YY 係羽毛球拍大牌子，

所以見到即時超開心，仲即時叫媽咪 whatsapp 比表姐睇，

表姐見到都話想要

至於鑽石大獎換番嚟球拍，恐怕要封塵了......

印印龍大行動

Bryan 間小學有一個所謂「印印龍大行動」，

就係當學生有什麼值得嘉獎，就會得到一個印印龍，

值得鼓勵事愈大，印印龍數目就愈多，

到學期尾就可以依印印龍數目換取禮物。

學期初前學生就要定一個目標，

想拎到乜嘢級別印印龍，

Bryan 初上小一，完全唔知乜嘢一回事，

所以就填咗目標係最低級別銅獎 (依次係鑽石、白金、金、銀、銅)

詎料上學期尾，

Bryan 同我哋講，佢拎到鑽石大獎，

可以優先揀取禮物。

事隔一日，佢又好開心同我哋講，

有羽毛球拍可以揀，

事緣上周末，Bryan 表姐買咗對羽毛球拍，

仲落公園同佢切磋球技，之後 Bryan 就話好想要
佢話問過另外兩位拎到鑽石大獎同學，

都唔係揀呢份禮物，所以唔擔心有人同佢爭....

我同媽咪冇同佢講，因為佢今年生日撞正考試期，

佢同堂家姐聯合生日會提早舉行，

我哋已經同 Bryan其中一個伯娘講咗話 Bryan 想要羽毛球拍。

我哋想 Bryan 靠自己努力拎到自己想要禮物，

我哋想佢保持呢份心情，以後繼續努力。


後來，我哋同 Bryan 講番，

伯娘應該會送羽毛球拍比佢，問佢覺得點?

Bryan 話都好，可以多啲人一齊玩~
我個囝，唔曳果陣都算幾乖

---

童年樂趣多

Bryan 好鍾意同班老表玩，

就算落樓下公園遊樂場打個轉都會樂半天....

好想有部無反之類輕巧相機拍低呢啲生活點滴 (不可能長備大機吧)

奈何銀根短缺...

唯有用手機吧，

雖則用緊部手機影相質素認真麻麻 (Motorola RAZA)，

好彩手機 apps " Instagram " 幫番唔少，

用呢個 apps 影相仲有個好處，就係練習用正方形構圖