2014年12月29日 星期一

【DAY 6】別府大型綜合式溫泉酒店 ~ 杉乃井

離開九州自然動物園,

我哋立即搭巴士返別府駅,

大家都想盡快入園,

就求其喺別府駅解決午餐,

就食拉麵啦


別府駅旁就有免費接駁巴去杉乃井,

好方便。

本來以為要分兩班接駁小巴,

 好彩我哋排頭位,

順利一齊上車~

去到杉乃井,

上房擺低嘢即同班細路去溫泉水上樂園玩,

因為5點 (又好似係6點) 就結束冇得玩啦

呢個連我都覺得好玩~


(遺失記憶卡,

其中最遺憾就係喺杉乃井影嘅相,

因為原來團友們都冇乜影過相,

只依賴我部相機,

而當日我又冇WIFI 過相落手機度之故)

***********************************************************

補充番少少關於杉乃井嘅嘢,

我睇唔少遊記大概知杉乃井人均計每人一晚大概12800 yen 上下,

當時我 book 晒機票、其餘酒店,

唯獨欠杉乃井未book,

因為價錢居高不下,

我做二手準備,

一方面每日上官網睇有冇特價,
又物色其他溫泉旅館,

最後終於等到,

佢有個宴會廳出租,

要12人以上至可以訂,

人均10800 yen 一晚,

包自助晚餐,

勁抵~

缺點係冇浴室洗手間,

因為呢個原故,

我哋訂多一間內附洗手間嘅大房比五位女士,

每人都係比多幾百yen。

我哋去到個宴會廳房間就知點解冇講人數上限,

真係超大,

真係擺晒床鋪,

50人都可以容納到。

大房間都超大,

有張大床,

另有偏廳,

5個人一間綽綽有餘。

至於自助晚餐,

雖然唔算豪華,

但都算ok,

細路玩綿花糖都好開心 XD

杉乃井係綜合式溫泉酒店,

有遊戲中心,

乒乓球、保齡球等等,

我哋第二朝臨別都碌番場拎, 哈哈~

最後一提,

呢度嘅主角 - 溫泉,

超正,

尤其係夜晚嘅激光表演,

大家唔可以錯過,

一家大細一齊浸住溫泉傾偈 (呢個係著泳衣浸嘅) 睇表演,

真係好難忘好難忘。

一句到尾,杉乃井,我推薦!!


DAY 6完】




2014年12月15日 星期一

【DAY 6】九州自然動物公園アフリカンサファリ餵猛獸

四位的士叔叔準時到達旅館接送,

佢哋又好體貼地幫我哋打傘 (落緊滂沱大雨) 同拎行李。

跟住唔使半個鐘就到達動物園。

*強烈建議由由布院去九州自然動物公園坐的士,

雖然北九州PASS 可以免費坐火車到別府,

但計車程再加去到別府要轉巴士 (巴士要自費) 同坐的士相差太遠,

當為用金錢買時間不為過,

如的士坐足4人更只係相差少少。

去到動物園,

可能天雨關係,

遊客唔算多,

我哋就靜靜等一早網上預約嘅 JUNGLE BUS


等雨勢稍停,

拿拿聲影番幅相,

呢架就係JUNGLE BUS,

有唔同造型o架~


我哋一家分配餵飼動物嘅飼料,

工作人員有介紹邊樣係餵邊種動物嘅,

我哋當然唔識聽啦,

所以期間只好偷瞄隔離嘅日本遊客,

佢哋餵乜我哋就餵乜 XD



Bryan 猛話好玩~






可惜,

因為遺失SD卡,

好多相片冇咗,

原本有好多動物特寫的說....嗚...

我哋之後又行吓商店,

又去某一個館影抱老虎仔相,

相片都係從缺,

好彩喺其中一團友手機搵番張 (冇望鏡頭都殺XD)


由於雨勢實在太大,

我哋只係隨便亂逛,

跟住嚟到呢度


 好可愛嘅猴子,

抵我哋買瓜子比你食


 然後又去咗呢度





之前睇人遊記,

除咗餵猛獸,

最令我感興趣就係近距離接觸袋鼠,

當我哋搵到佢哋嘅所在地,

竟然一隻都見唔到.....

原來去晒呢個通道避雨


因為落雨淋濕晒,

感覺有啲污糟,

同埋佢哋塞晒喺通道,

入去其實頗有難度,

好多團友可能怕比佢哋拳擊都冇入到去 XD


當我哋想通過呢條通道,

因為太大雨關係,

對面通道突然湧入大水,

大水夾雜袋鼠排洩物,

嚇到我哋急急轉頭走人,

十足災難片咁,哈哈哈

因為呢場大雨,

大家又覺得睇咗、玩咗最想做嘅嘢,

就提議早啲返別府,

去我哋今晚住宿嘅杉乃井~


【待續】

2014年12月9日 星期二

【DAY 5】推薦: 由布院溫泉旅館 由布院いよとみ Iyotomi



話說呢間旅館係由團友A嘅日籍老板代訂,


剛好剩番5間房全數比我哋訂埋,


其中一間係內付私人風呂嘅大房間,


呢間大房間以人頭計,每位貴幾百yen


團友A計過數,


認為我一家三口兩大一小住就最著數,


老婆都相當歡迎呢個建議,


於是我哋就當仁不讓入住呢間叫做嘅房間



由於遺失相片,只有呢張手機影嘅內付風呂照片




參觀完房間 (其實係其他人嚟我哋間房參觀) 同三個風呂 (大風呂、小風呂、露天風呂)

就到晚餐時間。

A團友嘅日籍老板已經預先幫我哋訂咗一家一份嘅豐後牛牛扒,

好期待哩~





豐後牛真係有入口即溶感覺,

而且香又濃,


牛有牛味,哇哈哈~~ (缺相,唔好意思)



偷偷放出呢張大合照,

希望團友們發覺時唔好鬧我 




跟住我哋就去浸溫泉,


識得浸梗係浸露天啦,


呢度三個溫泉可以當成私人風呂,


有個木牌裝有3盞小燈代表三個風呂,

當燈著咗就表示正有人使用中, 

我哋幾個男士等咗一陣就入到去, 

至於女士們唔願等又唔同我哋爭,

就同小女孩浸大風呂。

浸完溫泉舒服晒,

班細路話要放煙花,

我哋拎出喺中州驚安殿堂買嘅煙花出嚟放,

至發覺我買果兩盒煙花原來係頗大型煙花,

唔敢喺咁接近民居放,

反正落緊毛毛雨,

就大家分一包煙花玩玩就算




玩完煙花,

食埋 B-speak 嘅蛋糕至叫完美,

好食啊 (個人認為原味比較正)


至於第二朝嘅早餐,

麻麻地而已,擺設就幾靚





去露天風呂影番啲相先~

 
 

由布院,

好舒服,好 relax,

希望有機會再嚟~


【DAY 5 完 & DAY 6 開始】