行山樂 - 遍山芒草的大東山

今次行山期待已久，

不過要等班細路考完試至可以成事。

當日去到東涌嚇咗一跳，

由搭去昂坪嘅纜車處同整個巴士站都堆滿人，

我哋要出發去伯公坳嘅巴士都自然唔少人排隊，

好彩加開唔少巴士，

唔算等太耐就排到。

由伯公坳開始起行，

初段上坡踏好多石級，

都幾索氣，

上去到平地慢慢行，

加上陣陣涼風，

疲倦一掃而空

呢啲荒廢屋仔 (好似叫爛頭營?) 比想像中多

終於見到遍山芒草嘅情景，

爽呀~~

 飽覽完跟住落山，

我原以為好輕鬆，

點知原來係一直落石級冇得抖 

(皆因路窄人多好難停低)，

直行到黃龍坑郊野公園，

據講有幾條路落山，

姨仔一家之前另一段路程比較長但有平地休息

行到腳軟加腳震，

行到返東涌足足行咗五個鐘有多，

老婆都話下次可唔可以唔好揀咁長路程 XD

香港築地‧山貴水產

趁 Bryan 考完試兼夾媽咪生日，

去香港築地試吓味先~

個幾星期前試圖預約，

諗住閒日應該冇問題，

點知係成個月全爆，

認真誇張。

去到果然要排隊

不過好快就入到去，

入到去都唔覺係太多人....

第一眼就見到有零食賣，

唔平喎

 我哋比較鍾意食壽司刺身，

即刻去試食

三文魚、平目魚等一般壽司店都OK 嘅呢度水準當然得，

赤貝帶子呢度都相當得，

食得出鮮味，

比連鎖壽司店好得多

Bryan 呢件和牛壽司我都想食，

可惜我個set 冇 XD

最長龍係海鮮丼

左下角係前天氣小姐主理嘅龍蝦包，

當日唔見佢在場 XD

對我嚟講始終價錢算貴，

試過就算，

日本嘢留番日本食好啲，嘿嘿~