8月30日，星期一。
因為要去迪士尼續AP，
同埋當係暑期最後衝刺。
等到 Hoyin 上完游水課 + 食晏，
去到 DDL 已經係 3 點。
去到 DDL 至知，
原來暑假公園主題啱啱完結，
即係冇咗史迪仔大街跳舞騷... 同特別卡通人物影相...
水花巡遊都改咗3點半開始，
好彩趕得切
Hoyin 今日無端端話要坐火車，
我至發現原來咁耐以嚟都係坐過三次咁大把
今日最值得記存係，
Hoyin 陪我玩咗過山車 - Space Mountain
之前見佢喺 OP 玩滑浪飛船表現良好，
今日又見 DDL 個個 game 都排長龍，
唯獨太空山好似少人D，
就問 Hoyin 敢唔敢玩，
佢梗係拍晒心口話冇有怕啦，
玩完之後佢又係話好刺激，
我笑佢梗係全程都係耷低頭唔敢望啦，
激佢兩激佢話玩多次
返到屋企佢同媽咪牙斬斬講番，
仲指明話兩個表姐肯定唔敢玩，
媽咪問佢下次玩唔玩?
Hoyin 話︰
呢 D 嘢，玩一次就夠喇!!
今日 HOYIN 第一堂學游水，
短期目標係 HOYIN 唔怕水，盡情享受游水樂趣。
原本都帶齊架生影相架，
可惜員工話唔比影相，
我順口問點解唔比?
個員工就細細聲同我講: 一係你偷影幾張，
然後我詐蒂走過黎阻止你...
佢咁講我反而唔想影
見 HOYIN 全程笑容滿面咁學游水，
我就覺得媽咪呢個決定係啱
------------------------------------------------------
游完水，時間尚早，
反正都請咗假，於是又同 HOYIN 去巡視業務
颱風康森打唔正香港，
但都掛咗一號風球，
出發時藍天白雲，HOYIN 仲帶埋太陽超
由於遲咗出發，4點至到迪士尼，
諗住 HOYIN 錯過鍾意睇水花巡遊 tim...
點知夏令時間延至4點至開始，
啱啱趕得切....
又同到木偶影相
之後又去到森林睇表演
呢個時候，個天開始嚟料，
最後仲落狗屎，橫風橫雨....
卒之玩咗兩個鐘就要打道回府
P.S. 由於時間關係，呢次都係換唔齊閃咭，
不過意外地拎番巴斯光年閃咭.... HAPPY....
