參加咗蘋果日報同迪士尼合辦 Happy Christmas Moments 相片大募集，
僥倖成為 50位幸運兒之一
得獎者可以帶同一位親友入場參加「親親 Duffy 夢幻聖誕派對」，
仲可以抱走 Duffy 毛公仔。
於是自掏腰包買張飛比 Hoyin，
一家人罕有星期日入園喇
喺門口蘋果日報臨時counter 攞飛，
派咗 3 條專區手帶比我哋，
原來仲有兩套餐飲券／餐食券，
正~ 又慳番百幾
美國大街有好多類似佈置
第一站去同 Duffy 合照，排隊無聊，就叫 Hoyin 問哥哥姐姐帶手套披肩影相
懷疑員工想客人幫趁自家攝影師作品，永遠係 cut 梗少少手手腳腳
排咗十零分鐘，到我哋喇
薑餅人村莊一角
傻豬，唔會有人應門
唔同往年，有唔少佈景分佈園內比大家影相，
今年拍照位係集中喺薑餅人村莊，所以真係勁逼人，
要盡量避免影到途人真係要有耐性...
或者咁樣影都OK
呢次入園有個小插曲，話說上次萬聖節入園見扭波波哥哥扭個三眼仔好正，
於是呢次入園就叫 Hoyin 問 D 姐姐扭波波哥哥幾時同埋喺邊樹出現?
姐姐翻查一輪後答係 2:10pm & 3:30pm 會喺咖啡杯附近出現，
於是我哋就準時 2:10pm 等候扭波波哥哥出現，點知等咗十分鐘都未見人，
就問附近一個姐姐，姐姐又翻查一輪後答話應該係呢個時間，
say sorry 後叫我哋3點半再嚟，
我哋犧牲霸位睇巡遊依時再嚟，依然唔見人，
咁啱之前姐姐行過我就再問多佢一次，
佢查完一輪後同一個女經理同時出現我哋眼前，
女經理話唔好意思，原來扭波波哥哥今日休息
為表歉意，會送番份小禮物比 Hoyin，又可以安排我哋優先入座米奇金像劇，
我哋話要食嘢先唔睇金像劇喇，女經理就叫我哋九個字後嚟返呢度拎禮物...
我哋冇表示不滿都做到咁，十個讚
之後我哋返番嚟，女經理送咗年曆咭同一疊貼紙，
仲有兩個扭扭波
節目行程係安排 5:15pm 拎獎品然後 6:30pm 安排喺專區睇玩具巡禮，
諗住拎完獎品再周圍影吓相至返去睇巡禮都唔遲。
點知拎完獎品就被安排喺專區等候。
軟禁咗一個鐘後就係人群罅隙睇巡禮...
我諗係單位怕得獎者拎咗禮物閃人最後影唔到大合照啩
話分兩頭，安排全體大合照時都幾溫馨，
大會司儀叫我哋同最心愛人互望，
Hoyin 即刻望實佢媽咪
跟住又叫我哋將 Duffy 送比至愛，
Hoyin 猶疑一陣送比媽咪 （不過好快攞番）
獎品 Duffy 毛公仔，Hoyin 愛不釋手
*除咗 Duffy 毛公仔，仲有呢個獎品擺設....
【完】
沒有留言:
張貼留言