久違了的冠軍

太耐冇update 個blog 了，因為太懶 XD

但今日太高興，忍唔住要同大家分享吓...

就係我至愛球隊終於拎到冠軍啦~

決賽對手係牌面稍弱o既侯城，

老實講，原先諗住係十拿九穩，

亦一早參加球迷會500人睇波大party，

點知唔夠8分鐘就比對手領先2球，

實在始料不及，

好彩憑卡蘇拿、哥斯爾尼、藍斯三個入球反勝對手，

拎到久違了的冠軍，

同因為阿仙奴而認識o既朋友互相擁抱慶祝，

果種開心法真係非筆墨所能形容，

期望冠軍陸續有來。

ONE LIFE ONE TEAM ~ 傑志 VS 阿仙奴

7月29日‧晴

終於等到呢一日 -- 親臨球場睇阿仙奴比賽

$880 一張門票的確頗貴，

不過可以近距離睇到愛隊比賽，又和志同道合球迷一齊同愛隊打氣，

貴少少都值得。

當日烈日當空，真係曬到暈

好彩臨近開賽時間，烈日逐漸移走，

大家都靜待心愛球員出場....



















球迷會會長同佢o既接班人

比賽未如我估計咁一面倒，老實講，傑志表現仲出色D。

最後兩隊踢成 2:2，和氣收場。

場內競爭激烈，場外雙方球迷都各出奇謀，

為自己球隊打氣，可同時又會一齊做人浪搞氣氛。

我哋阿仙奴球迷一齊出隊歌，大聲打氣，又一齊媽叉球證，

我鮮有現場睇波，呢個現場氣氛真係好過癮好難忘。

希望阿仙奴不久將來會重臨香港同我哋見吓會啦。

阿仙奴訪港球員見面Party

完咗簽名會，同朋友去黃埔美食坊食個午餐，

跟住就出席見面 party ，

由於簽名會陣容太震撼，

老實講，見面 party 個陣容削咗 D，

可能因為球星如禾仔、張伯倫等都要去旺角出席商業活動啦。

好彩個司儀都好識搞氣氛，

而當球員出場，球迷都表現高興，紛紛舉起相機拍照

出席 PARTY 朋友都有隨機o既小禮物。
唔錯o架，我同 Bryan 都收到相、帽同鎖匙扣

 曬吓件簽名球衣先



【完】

ONE LIFE ONE TEAM! 阿仙奴球星簽名會

7月28日，晴。

呢一日係阿仙奴o既簽名會加見面會，

簽名會係香港傑志搞的，據知阿仙奴球迷會所得o既飛並不多，

雖然同會長相熟，不過佢都愛莫能助.....

點知奇跡來了，當日早上接過會長電話，

我可以後補身份加入簽名會

真係開心到唔識講o野

即刻同 Bryan 落街食早餐然出發到黃埔凱逸酒店



aiya..... 去到聽到有個球迷同我講，如果早到十五分鐘，就可以同領隊雲加影相喇

冇計..... 鬼叫自己住得遠咩

阿仙奴球迷真係唔講得笑，相中球迷好多都唔係去簽名會o既，

佢哋係等下晝見面會或搏有球員出現可以簽名影相



Bryan 同我球迷會老友記下一代合照，巧合地佢哋分別穿上不同年份o既主場球衣




另一老友記o既千金



簽名會總共有二百人，我哋分成四批，即每批五十人入去簽名會搵球員影相簽名等，限時十五分鐘。

入去之前我同朋友仲商量點樣分組可以互影，

不過sorry，入到簽名會我已經失控，立即去搵我心儀o既球星，瞬即同我話合組o既朋友失散



除o左簽 Bryan 件球衣，我未著過、新一季球衣都用o黎簽名，太興奮了



禾確特呀!!







高基連~~







張伯倫~





法比安斯基~



贊師父





基歷治







謝雲奴





桑治







特別一提，山度士係當中最友善，我想搵佢簽球衣，佢叫我唔好急，然後o係相片簽個大名(相片係大會安排的) 交比我再簽球衣





宮市亮





簽名會完畢，落到樓下撞到未有出現簽名會o既迪佐奴





後記﹕呢個簽名會真係令我興奮不已，不過當中有少少遺憾，

第一就係我唔得冷靜，球星其實好似擺攤位咁列席o既，

我驚時間唔夠就撲去心儀球星處，其實如果由位置第一開始輪住簽名同影相，

會更有效率同時唔會拎漏簽名，

我就因為咁，以為已經搵咗華美倫簽名，

結果就漏咗佢 (阿迪達、華美倫、禾確特、張伯倫係我事前諗住必簽四大)

第二遺憾係集中同 Bryan 影，自己合照欠奉係必然o既 (有一張朋友推我過去同禾仔影，在此謝過)，

不過我應該安排一張我同 Bryan連同球星合照o既.....可惜呀

當時抱住亢奮同遺憾o既心情..... 我難得失眠了