疊馬廣州2天遊 [DAY 2]

第二日朝早，
先去酒店食自助早餐，
但係我哋訂咗8間房，得16張早餐飛，
仲爭8張至夠數（有個1歲姨甥女不佔票）。
於是有人提出，唔想食酒店早餐就去飲茶，
問過 Hoyin，Hoyin 話想食酒店早餐，
於是我哋一家就攞咗三張飛去食…
等位之際，
見到姨仔一家4口入埋嚟，
原來佢哋話睇吓有乜嘢食至決定，
最後佢哋話D 嘢食都OK喎，
不如喺度食…
姨仔老公突然講，
我哋都入咗嚟，唔通出去買番飛入嚟呀??
就係咁，
我哋慳咗4張飛...


到後來我至知，原來有3個細路懶床唔肯起身冇食早餐，
最後補咗一張小童飛就全體入席…


個自助餐不過不失啦，
都有專人同D客煎蛋／奄列，
排我前面等煎蛋大陸C9，
拎咗自備鱷魚蛋叫師傅煎，
原來鱷魚蛋要煎好鬼耐至熟，
等到我發霉…


臨閃影下永成大酒店外觀 

食完早餐，
約咗旅程易David，
幫我哋發票攞團體飛，
團體飛大人155人仔，
小童就90， 1.2米樓下就免費。
有兩個媽咪錯估自己囝囡身高，變咗買多咗票，蝕! 


長隆野生動物園就真係好鬼大，
由於plan 定5點走人，
好難一日行得晒，
只係plan 定有幾樣一定要玩：
坐遊覽車、睇熊貓、餵長頸鹿、大笨象&馬騮仔。


入園冇耐就見到人排隊坐遊覽車，
我哋就排埋一份，
排隊期間見到個大陸C 9 抱住個囝喺垃圾筒度大解
天啊! 個公廁其實喺右手邊30米 處…
唉… D 大陸人素質真係… 
終於排到啦…
全體人員啱啱霸晒一卡列車，爽!


我估容易見過大蛇屙尿 




係囉，張牙舞爪至似老虎家嘛

 

員工話 Hoyin 太細個唔夠力托起隻鸚鵡，我哋叫員工比佢試試，
佢哋商量後就範 
Hoyin 默默運勁...



兩個可愛姨甥女~



餵長頸鹿真係好玩~
每棵10人仔~



玩完動物園，
叫司機車我哋去尋晚食唔到維福粥城，
係都要食吓粥底打邊爐。
原先個經理安排我哋上閣樓分坐兩間房，
後來知我哋想打邊爐就叫我哋落番樓下分三張中檯坐。
仲話咁熱天好少會打邊爐…
妖，你理得我哋丫…
到我哋點菜時，佢至話呢樣冇、果樣冇…
連我最愛肥牛都冇
即係焗我哋嗌餸食飯
整定同粥底打邊爐無緣 


之前已同司機商議載埋我哋返深圳，
經討價還價後1200人仔成交。
計落平過搭河蟹號400人仔。
其實坐河蟹號又快又舒服，
不過有團員覺得轉車麻煩，
同埋唔知要等幾多班車至有位坐，
咁講又有幾分道理，
真係有辣有唔辣
返到深圳已經9點幾，
有姨甥女第2日要返學，屋企又住得遠，
搞到姨仔一家好似滾水淥腳咁走人
有團員講，咁多人下次包團可能有著數…
睇吓點~~ 


旅程至此完畢，祝旅途愉快!!


[DAY 2 完]

疊馬廣州2天遊 [DAY 1]

原本隨口叫姨仔一家去廣州玩2日，
最後講吓講吓…變咗七家人廿五口浩浩蕩蕩出發…
咁多人如果book 到祈福別墅就爽咯，
可惜full 晒
經旅程易提議後，
最後扑鎚book 番禺永成大酒店，
另外我地又包咗架29人車兩日遊。


出發前夕，
橫生節枝!
有姨生女報稱發燒未退，醫生話係中暑…
我唯有叫佢飲多d水，休息多d，
希望冇事可以出發。
跟住聽到個電話仲大鑊 !
姨仔報稱大囡本特區護照過咗期 !
我問過入境處朋友，
小朋友身份證冇相，冇特區護照真係過唔到關…
噢… 唔通最先約果家反而去唔成??
好彩 Shirley 另一個家姐聽到消息話可以申請回港証，
即日申請即日攞，
我地約十點集合有機會會合埋我哋…
…唯有希望出發順順利利啦 


出發喇，Hoyin 爭住話要拖喼…

食早餐期間收到好消息，
姨甥女冇乜大礙如期出發，
準時10點到火車站，
竟然姨仔一家都趕得切黎，
Good~~~ 


去到深圳坐河蟹號到廣州東站，
好快好舒服，
仲有枱可以玩下啤牌。

喺廣州東站搵到包車司機，
第一站係去上下九步行街蓮香樓歎茶。


食完覺得不過不失，
冇網友吹噓得咁好食（個人意見）。



食完野求其行下條步行街就叫咗司機車我哋去天河城，
女士們去行街shopping，
男士們就帶細路到頂樓打機…
間機竇都幾大，逢周六周日及公眾假期就細路都可以入場，
我哋先玩碰碰車，
之後就去打機，
由於呢次去細路有大有細，
大d 細路搵機打，細就玩類似冒險樂園裏面遊戲，
機竇太大，
玩玩下走失晒 


出去跟團好怕團友遲到要成班戇居居等，
好彩呢次家族旅行家家都準時，
集齊後出發到酒店放低行李先~
我哋總共訂咗8間雙人房，
因為普通房full 晒，有兩間係高級雙人房，
分配門咭時大家都唔知情各安天命，
Shirley 話要中間房我就求其抽咗中間一張門咭，
大家上到房巡查後發覺我間房係最大就媽媽聲
由於樓則問題，我間房真係最大，仲大過所謂高級雙人房，
而所謂高級雙人房除咗其中一張床係size較大之外就搵唔到有乜分別，搵笨!


稍事梳洗後準備出發食晚飯，
落到counter，有成員好關心咁問麻雀房幾錢租一晚??
點知答覆係冇…
因為大陸搞緊唔知乜野運動會(?)，
所以呢類耍樂都要關掉… 有冇搞錯! 


出發食晚飯，
有兩pair成員話兩年前黎食過一間粥水打邊爐幾正，
提議去食，
大家都冇異議，就咁決定。
提議地方喺番禺廣場附近，
原來車去都唔近，
我哋沿途經過一間維福粥城，
有人話肚餓不如是旦去呢間試試…
可惜爆晒，又要上番車繼續旅程，
去到成員講食肆，門面好靚叫滋粥館，
睇個勢價錢唔慌平，
成員而家至講，兩年前食兩家要八百人仔…
嘩，而家至講
冇法，咁遠嚟到又肚餓唯有照去，
點知呢間都係爆，
有成員話之前天河城返酒店，
離酒店幾近經過一間食肆都係打邊爐，
不如返去睇睇有冇位?
即係行大運! 


就係呢架殘殘哋29人車呢兩日載我哋去玩架喇~
全日兜嚟兜去，
終於要去加油...
我哋亦順便去油站便利站補充零食同埋買兩包花生準備聽日去動物園餵馬騮~


最後去到呢間有米氣終於有位喇 


坐低嗌粥水打邊爐，點知話粥水沽清，
唯有清水打… 頂
不過都幾美味~~


之前因為行大運，見間野離酒店都算近就叫司機可以走人先，
點知我哋食完嘢就落狗屎
間嘢話幫我哋截的士，
點知等好耐都係截得一架，
其餘人等見雨勢減弱就急步行返酒店，
好彩天公冇再玩我哋~ 


返到酒店，d 細路仲精力充沛，
細就走來走去，間間房都走均晒，
大d 就玩啤牌，
最後成點至捨得返房休息~ 


[DAY 1 完]