隨影 - 香港歷史博物館

喺 Facebook 見到朋友帶囝囡去歷史博物館，
影咗啲相，
見到呢個懷舊feel，
啱晒我channel，
搵日帶咗 Bryan 去影吓相...

原來而家歷史博物館做緊玩具展，
見番好多我童年玩過嘅玩具，
頗有感觸，
出到館外見到有白兵做佈景，
又有得影，哈

行山樂 - 梧桐寨瀑布

行山隊又出擊，
呢次團長帶我哋行梧桐寨瀑布。

我哋由大埔火車站搭64K 往元朗(西)總站，
然後寨乪站下車開始起行。

沿途順序經過細、中、大三個瀑布，
團長表示可以順路行至大帽山，
但班反斗星細路話要返回頭路搭車去元朗食B仔涼粉所以作罷 XD

全程連休息加影相大概三個半鐘，
唔辛苦幾好玩，
連 Bryan 都話想再嚟多一次。

大家可以考慮一下，
當然，安全為上，
尤其小心滑倒啊~ 

 

註: 貪玩將綠色改做泥黃色，覺得肅殺啲，嘻

屯門美樂 DRAGON BOWLING

假日 Bryan 又約咗細表姐去碌鈴，
屯門美樂呢個保齡球場真係平到笑，
假日每個鐘任玩只係 $100，仲要係免租鞋，
我哋四個人玩，平均每人玩足4局，
1局平均十幾蚊，分分鐘平過大陸玩 XD

西環隨影

大概兩星期前睇到無線一個節目，
係介紹西環，
其中就有介紹食點心嘅新興食家，
媽咪話想去試。
我就比鐘聲泳棚呢個景點吸引，
見好耐冇同 Bryan 影相，
趁佢踏入11歲拎得兒童身份證，
周日就舉家去西環行吓影吓相。

第一個目的地係新興食家，
去到果然排晒長龍，
雖然係排隊，
但其實排到你時都係見到有位就要攝人去果隻，
啲阿姐太忙都唔會點招呼你，
食後感係味道唔錯的，
個人覺得都係添好運勝一籌，
而且太迫人坐得唔係好舒服，
叫做試過就算 。

食完就依google map 行去鐘聲泳棚，
行到半路我起咗疑心，
見條路愈行愈上，
好似離個海愈嚟愈遠咁，
於是見到有條長樓梯又望到海，
諗住落去倚住個海邊行實冇衰，
點知係掘頭路嚟嘅，
但幸好錯有錯著，
見到呢個景，
影咗全日最滿意嘅相 XD

影完相跟番google map 行，
原來有條長樓梯行落去泳棚，
落到去見到好多人呀，
仲有唔少貌似菲籍工人楂住相機等影相，
排到我哋時拿拿聲叫 Bryan 影幾幅相就閃，
連全家福都唔記得叫人楂機影，嗚...

到此一遊相

之彥BB

老友Fanny添丁、孖囡多咗個細佬，
可喜可賀。
約咗個周末去佢哋豪宅影家庭照。

初次見面...
之彥BB 好過癮

 3姐弟合照

BB 影多幾張全家福就瞓覺覺，
咁就家姐影啦

孖囡出世冇耐同佢哋第一次影相果陣，
記得工人姐姐話我偏心妹妹，
影佢多啲，
呢次特登同家姐影多2張 XD

 

約定等之彥BB 大個少少再影~

三個BB女

阿仙奴球迷會其實不乏女球迷，
早年球迷會認識其中兩個青春少艾，
時光荏苒，
已是人母，
其中一個已是2個女孩的媽媽。
我仲未同3個女娃娃見過面，
就相約咗某個周末馬灣相聚，
3個女娃娃都好得意，
尤其最細個嘅 "小胖" 👄

下次再見~~

德福廣場「星．光．幻彩萬華鏡」

Bryan 陪咗我去九龍灣換 earphone，
途經德福廣場，
見到有萬花筒影，
就排隊影咗幾張，
因為多人排隊關係，
匆匆影幾張留念就算，
如果有得慢慢影就好玩了