o係Q立方填完表比完錢，Bryan 就爭先叫職員哥哥同佢戴上手帶，
然後好快就不知所踪，
入到去見到佢原來已經拎咗長衫長褲著
(Q立方規定要著長衫長褲，場所有衫可以免費借穿)
仲記得上年Bryan 同表姐去童夢天地玩，Bryan 立心挑戰直角sir 滑梯，
點知最後膽怯臨陣退縮、好唔甘心眼泛淚光個樣....
今年o既佢終於成功挑戰，
佢好開心，我都好開心，
個sir 滑梯設計真係幾得人驚o架，我要比十個叻 Bryan
因為時間關係，唔可以玩足兩小時，
Bryan 唔係幾捨得走，
冇辦法，為食三哥話要去福隆新街搵食...
我哋由威尼斯人搭接駁巴去粵通碼頭(近新馬路)，然後行去福隆新街...
途中聞到好香杏仁餅味，原來係"最香餅家"，
佢哋用炭火整餅，唔通真係會香啲?
吸引咗大家買吓手信
跟住就去咗上年嚟澳門都有幫趁o既祥記麵家，
佢o既雲吞蝦籽撈麵真係好味，同我喜歡大埔o既平記麵家有得揮
然後為食三哥又捐窿捐罅咁搵咗檔街邊夾仔餅/雞蛋仔檔，
見到檔口好多人圍住，好好生意，應該幾出名吓....
雞蛋仔新鮮出爐好正，頂呱呱
o係呢個時候，相機冇電....
係兩舊電池都冇電，出發前明明叉滿o格，又唔係影得多相。
最後至發覺，原來雜嘜叉電器壞咗，非常好彩，o係出發日本前發覺，
唔係就冇得拍 video
冇相交代，草草講吓行程算...
之後我哋行去八佰伴方向搭接駁巴去銀河，
方便行去官也街食晚飯。
原本為食三哥提議食譚家翅，可惜佢哋店面太細，我哋人太多，
老細話我哋要分批入至得，唯有放棄。
卒之幫趁咗誠昌，
呢間以水蟹粥聞名，但聽講好似易咗手，
水準下滑，
食完大家都覺得不過爾爾。
行程最後一站就係去鉅記買手信，進貢咗唔少。
雷門澳門之行就o係嘻嘻哈哈聲中落幕，
唔知幾時再有機會咁疊馬一齊出去玩呢?
沒有留言:
張貼留言