悠遊澳門 【序】

大佬們同細妹 & 老媽子暑假去咗歐洲玩，

大佬原先係約埋我一家o既，

不過撞啱我要去日本（亦都冇咁多銀彈啦）未能一齊成行....

Bryan 又好恨同家姐表哥一齊出外遊玩，

於是促成呢次澳門之旅。

我哋首先搵酒店，

我心儀o既望廈賓館晨早爆滿，

諗住問吓威尼斯人要幾錢，

索價 $4XXX

再問其他酒店，

就算有房都比平時貴四五倍，

退而求其次，

唯有搵珠海酒店。

喺攜程網求其搵到一間叫「華僑賓館」，

只須 $220 人民幣一晚，

就預約咗。

後尾我一個阿哥原來識人仲拎到優惠折扣，

即係平上平

搞掂完酒店房間就去買船飛，

我搵日放工去中旅社打算買定晚上九點o既回港船飛，

點知職員話當日傍晚後船飛一早爆滿

最早要凌晨兩點至有位... 據聞係暑假 + 周日 + 女排大賽關係云云...

我問係咪噴射飛航只係撥一部份飛比佢哋所以咁快賣晒，

佢話係聯線，即係呢度顯示爆滿就代表度度都冇飛賣...

我唔信邪即去上環一轉睇睇情況，

好彩喺噴射飛航 COUNTER 買到回港船飛...

我同售票職員講喺中旅社買唔到飛，

個售票職員嘿嘿冷笑：梗係啦.... 呢度買仲可以碌卡唔收手續費 tim

最後我哋喺網上訂咗金都酒店自助晚餐

同第二晚o既富士葡式美食

萬事俱備，準備起行 lu