頑遊名古屋‧岐阜‧三重12天自由行2015 DAY 9 重遊鈴鹿賽車遊樂場 鈴鹿サーキット 【卷一】

嚟到行程第九日，

好玩地方不妨一玩再玩，

今日重臨鈴鹿賽車遊樂場。

由名古屋搭近鐵到白子，

再轉巴士就到

白子駅一出就見到巴士站，

排最前果架就係。

去到見到離下一班巴士有一個鐘時間，

就到附近 AEON 逛逛，

買買零食。

返到巴士站，

我哋一群人坐喺第二格巴士位置長椅傾偈，

過咗一陣有個車長埋嚟向我哋嘰嘰咕咕講嘢，

我哋當然唔知佢講乜，

後來佢轉頭去一處地方拎張鈴鹿賽車遊樂場圖片出嚟，

再指前面....

我哋至估到佢意思，

佢應該係見到我哋呢班遊客實係去鈴鹿，

驚我哋排錯隊，

好心示意我哋去鈴鹿應該係前面處。

哈哈，真好人。

我乘機出示近鐵五日券，

問係咪坐呢架巴士係免費。

佢睇咗PASS 一陣話OK 

-- 所以根據呢個車長所講，同埋來回共搭4次經驗，

我證實SHOW 近鐵PASS 係可以免費坐呢程巴士嘅~~

入到園，

唔使講嘢，

即刻去買 Circle Kart 乘車券先

入園後望住摩天輪方向，

經過條行人天橋就見到....

我個人認為去鈴鹿一定要坐 Circle Kart，

雖然要另外付費，

但係可以喺真正賽道騁馳，

真係機會難逢。

(寫呢篇blog 剛剛知道 Circle Kart 最後營運日係11月15日，

取而代之係 Circle Challenge，

估計只係車款有改動，會喺出年3月開始有得玩，

大家留意番啦)

 每日限量，先到先得。

大概中午至夠鐘玩，

入去睇睇先

全家福~~

【待續】