印印龍大行動

Bryan 間小學有一個所謂「印印龍大行動」，

就係當學生有什麼值得嘉獎，就會得到一個印印龍，

值得鼓勵事愈大，印印龍數目就愈多，

到學期尾就可以依印印龍數目換取禮物。

學期初前學生就要定一個目標，

想拎到乜嘢級別印印龍，

Bryan 初上小一，完全唔知乜嘢一回事，

所以就填咗目標係最低級別銅獎 (依次係鑽石、白金、金、銀、銅)

詎料上學期尾，

Bryan 同我哋講，佢拎到鑽石大獎，

可以優先揀取禮物。

事隔一日，佢又好開心同我哋講，

有羽毛球拍可以揀，

事緣上周末，Bryan 表姐買咗對羽毛球拍，

仲落公園同佢切磋球技，之後 Bryan 就話好想要
佢話問過另外兩位拎到鑽石大獎同學，

都唔係揀呢份禮物，所以唔擔心有人同佢爭....

我同媽咪冇同佢講，因為佢今年生日撞正考試期，

佢同堂家姐聯合生日會提早舉行，

我哋已經同 Bryan其中一個伯娘講咗話 Bryan 想要羽毛球拍。

我哋想 Bryan 靠自己努力拎到自己想要禮物，

我哋想佢保持呢份心情，以後繼續努力。


後來，我哋同 Bryan 講番，

伯娘應該會送羽毛球拍比佢，問佢覺得點?

Bryan 話都好，可以多啲人一齊玩~
我個囝，唔曳果陣都算幾乖

---